രാത്രികാല യാത്രാ നിരോധന ത്തിന്‍റെ പശ്ചാത്തലത്തില്‍ ബംഗളൂരു റൂട്ടിലെ ബസ് സമയം പുനഃക്രമീകരിച്ചു. കോഴിക്കോട്ടുനിന്ന് ബംഗളൂരുവിലേക്കും തിരിച്ചുമുള്ള സര്‍വീസ് സമയങ്ങള്‍ മാറ്റി നിശ്ചയിച്ചിട്ടുണ്ട്.

നിരോധന സമയത്ത് അതിര്‍ത്തി വനമേഖലയില്‍ എത്താത്ത രീതിയിലാണ് കെഎസ്ആര്‍ടിസിയും സ്വകാര്യ ദീര്‍ഘദൂര ബസുകളും സമയം പുതുക്കിയത്. ചില ബസുകള്‍ ഗോണിക്കുപ്പ-കുട്ട-ഹുന്‍സൂര്‍-മൈ സൂര്‍ വഴിയാക്കി. ഇവയുടെയും സമയക്രമത്തില്‍ മാറ്റം വരും.

കോഴിക്കോട് കെഎസ്ആര്‍ടിസി ഡിപ്പൊയില്‍നിന്നു രാത്രി ഒമ്പതിനു പുറപ്പെടുന്ന ബംഗളൂരു ബസ് 9.30നും, 9.30നു പുറപ്പെടേണ്ടത് 12 മണിക്കുമാക്കി. 10 നു പുറപ്പെടേണ്ട ബസ് 1.30ന്. 10.45ന്‍റേത് ഒരുമണിക്ക്.

രാത്രി എട്ടിനും 9.30നും പുറപ്പെടുന്ന ബസ് മാനന്തവാടി, കോണിക്കൂര്‍, മല്‍സൂര്‍, മൈസൂര്‍ വഴിയാണ് ബംഗളൂരുവിലേക്കു പോവുക. രാത്രി 11 നു പുറപ്പെടുന്ന മൈസൂര്‍ ബസ് 1.30നും 11.30ന്‍റെ ഫാസ്റ്റ് പാസഞ്ചര്‍ 12.30നും പുറപ്പെടും.

കെഎസ്ആര്‍ടിസി ബംഗളൂരുവില്‍നിന്നു രാത്രി 9.30നും 10.30 നും എറണാകുളത്തേക്ക് നടത്തിയിരുന്ന സര്‍വീസ് രാത്രി 11നു ശേഷമാക്കി. 10 മണിക്ക് കോഴിക്കോട്ടേക്കുള്ള സര്‍വീസും ഇങ്ങനെതന്നെ. എല്ലാ ബസുകളും 10-15 മിനിറ്റ് വ്യത്യാസത്തില്‍ ബംഗളൂരുവില്‍നിന്നു പുറപ്പെടും. നേരം പുലരുമ്പോഴേക്കും ഇവ ഒന്നൊന്നായി ബന്ദിപ്പൂരിലെത്തും.

ബംഗളുരുവില്‍നിന്ന് വൈകിട്ട് 6.30നുള്ള കോഴിക്കോട് ഡീലക്സും ഏഴിനുള്ള കോഴിക്കോട് സൂപ്പര്‍ ഫാസ്റ്റും എട്ടിനുള്ള മലപ്പുറം സൂപ്പര്‍ ഫാസ്റ്റും മൈസൂര്‍-ഹുന്‍സൂര്‍-ഗോണിക്കുപ്പ-കുട്ട വഴിയാക്കി.

വൈകിട്ട് ആറിന് ഗൂഡല്ലൂര്‍-നിലമ്പൂര്‍ വഴി പോയിരുന്ന കോട്ടയം ഡീലക്സ് ഇനി വൈകിട്ട് നാലിനാണു പുറപ്പെടുക. വൈകിട്ട് ഏഴിനു പുറപ്പെട്ടിരുന്ന ഗുരുവായൂര്‍ ഡീലക്സ് 4.15നു യാത്രതിരിക്കും. രാത്രി 8.30ന് പുറപ്പെട്ടിരുന്ന തൃശൂര്‍ ഡീലക്സ് രാത്രി 11നു ശേഷമാണ് പോവുക.

ഗതാഗത വിലക്ക് പിന്‍വലിക്കാത്തതില്‍ പ്രതിഷേധിച്ച് സെപ്റ്റംബര്‍ ഒമ്പതിന് ബംഗളൂരു റൂട്ടില്‍ വാഹനപണിമുടക്കിന് സര്‍വകക്ഷി ആക്ഷന്‍ കമ്മിറ്റി ആഹ്വാനം ചെയ്തിട്ടുണ്ട്.

മൈസൂര്‍-മാനന്തവാടി-കല്‍പ്പറ്റ, മൈസൂര്‍-ഗുണ്ടല്‍പ്പേട്ട-സുല്‍ത്താന്‍ബത്തേരി-കോഴിക്കോട്, മൈസൂര്‍-ഗൂഡല്ലൂര്‍-ഊട്ടി റൂട്ടുകളിലാണ് പണിമുടക്ക്.