വണ്ടി നിറുത്തിയില്ല; യാത്രക്കാരന് കണ്ടക്ടറുടെ കണ്ണില് സ്പ്രേയടിച്ചു
Posted by Sujith Bhakthan at Wednesday, 16 December 2009
തിരുവനന്തപുരം: സ്റ്റോപ്പില് ബസ് നിര്ത്താതിനെച്ചൊല്ലി യാത്രക്കാരനും കെ. എസ്. ആര്.ടി.സി കണ്ടക്ടറും തമ്മിലുണ്ടായ വാക്കു തര്ക്കത്തിനിടെ യാത്രക്കാരന് കണ്ടക്ടറുടെ കണ്ണില് സ്പ്രേ പ്രയോഗിച്ചു. തുടര്ന്നുണ്ടായ സംഘട്ടനത്തില് യാത്രക്കാരനെ കണ്ടക്ടറും ഡ്രൈവറും ചേര്ന്ന് മര്ദ്ദിച്ചവശനാക്കി. പരിക്കേറ്റ യാത്രക്കാരന് സൌത്ത് കാലടി സ്വദേശി സുനില്കുമാറിനെ ജനറല് ആശുപത്രിയില് പ്രവേശിപ്പിച്ചു. ആത്മരക്ഷാര്ത്ഥം സ്ത്രീകള് ഉപയോഗിക്കുന്ന കണ്ണിന് എരിച്ചിലുണ്ടാക്കുന്ന സ്പ്രേയാണിതെന്ന് പൊലീസ് പറഞ്ഞു. സുനില്കുമാര് കെ.എസ്. ആര്.ടിസിയിലെ മുന് എംപാനല് കണ്ടക്ടറാണ്.
ഇന്നലെ രാത്രി എട്ടുമണിയോടെ സൌത്ത് കാലടിക്കടുത്തു വച്ചായിരുന്നു സംഭവം. കിഴക്കേക്കോട്ടയില് നിന്ന് പോകുകയായിരുന്ന ബസിലെ ഒരു യാത്രക്കാരി ഇറങ്ങണമെന്ന് കണ്ടക്ടറോട് ആവശ്യപ്പെട്ടെങ്കിലും സ്റ്റോപ്പില്ലെന്ന് പറഞ്ഞ് നിര്ത്താന് കണ്ടക്ടര് തയ്യാറായില്ല. ഇതിനെ ചൊല്ലി സുനില്കുമാറും കണ്ടക്ടറും തമ്മിലുണ്ടായ വാക്കുതര്ക്കം സംഘര്ഷത്തില് കലാശിക്കുകയായിരുന്നെന്ന് പൊലീസ് പറഞ്ഞു.
Source: http://news.keralakaumudi.com/
