ആയൂര്‍ : ആയൂര്‍ കെ.എസ്.ആര്‍.ടി.സി ഓപ്പറേറ്റിംഗ് സെന്റര്‍ പുതിയ സ്ഥലത്തേക്ക് മാറ്റും. സെന്ററിന് വേണ്ടി ആയൂര്‍ക്ഷേത്രത്തിന് സമീപം രണ്ടേക്കര്‍ സ്ഥലം ഇന്ന് (തിങ്കള്‍) അക്വയര്‍ ചെയ്യും. രണ്ട് കുടുസുമുറികളിലായാണ് ആയൂരിലെ കെ.എസ്.ആര്‍.ടി.സി ഓപ്പറേറ്റിംഗ് സെന്റര്‍ ഇപ്പോള്‍ പ്രവര്‍ത്തിക്കുന്നത്. പരിസരമാകെ മാലിന്യം കുന്നുകൂടി ദുര്‍ഗ്ഗന്ധം വമിക്കുന്നു. കംഫര്‍ട്ട് സ്റ്റേഷന്‍ വൃത്തിഹീനമായതിനാല്‍ ആരും ഉപയോഗിക്കാറില്ല. ഏഴ് സ്വകാര്യവ്യക്തികളില്‍ നിന്നാണ് ബസ് സ്റ്റാന്‍ഡിന് വേണ്ടി സര്‍ക്കാര്‍ സ്ഥലം ഏറ്റെടുക്കുന്നത്.

കെ. രാജു എം.എല്‍.എ, ഇടമുളയ്ക്കല്‍ ഗ്രാമപഞ്ചായത്ത് പ്രസിഡന്റ് റംലി എസ്. റാവുത്തര്‍ എന്നിവരുടെ ശ്രമഫലമായാണ് സ്ഥലമെടുപ്പുനടപടി വേഗത്തിലായത്. സ്ഥലമേറ്റെടുക്കുന്നതിനാവശ്യമായ തുക അടയ്ക്കാന്‍ പഞ്ചായത്ത് തയ്യാറാണെന്ന് പ്രസിഡന്റ് അറിയിച്ചു. പുതുതായി നിര്‍മ്മിക്കുന്ന ഓപ്പറേറ്റിംഗ് സെന്ററിനോടൊപ്പം ഷോപ്പിംഗ് കോംപ്ളക്സും പണിയും.

ചുവപ്പുനാടയില്‍ കുടുങ്ങിക്കിടക്കുകയായിരുന്ന ഓപ്പറേറ്റിംഗ് സെന്ററിന്റെ നിര്‍മ്മാണം എത്രയും വേഗം പൂര്‍ത്തിയാക്കാനാണ് എം.എല്‍.എയുടെയും പഞ്ചായത്ത് ഭരണസമിതിയുടെയും തീരുമാനം. ആയൂര്‍ കെ.എസ്.ആര്‍.ടി.സി ഓപ്പറേറ്റിംഗ് സെന്ററിന്റെ ശോച്യാവസ്ഥയെയും സ്ഥലപരിമിതിയെയുംകുറിച്ച് കേരളകൌമുദി ഡിസംബര്‍ 9ന് 'ഇതിന്റെ പേരും ബസ് സ്റ്റാന്‍ഡ്' എന്ന തലക്കെട്ടില്‍ റിപ്പോര്‍ട്ട് പ്രസിദ്ധീകരിച്ചിരുന്നു.

Source: http://news.keralakaumudi.com/beta/