കേരളത്തിലെ ആനവണ്ടികളുടെ ( കെ എസ് ആര്‍ ടി സി ബസ്) വിവരങ്ങള്‍ ഇനി മുതല്‍ ഓണ്‍ലൈനില്‍ ലഭ്യമാകും. ലഭ്യമായ വണ്ടികളുടെ സമയവിരങ്ങള്‍, റൂട്ടുകള്‍, ചാര്‍ജുകള്‍, കെ എസ് ആര്‍ ടി സിയുമായി ബന്ധപ്പെട്ടുള്ള വാര്‍ത്തകള്‍ എല്ലാം പുതിയ വെബ്സൈറ്റില്‍ ലഭ്യമാണ്.

കെ‌എസ്‌ആര്‍‌ടിസിബ്ലോഗ് ഡോട്ട് കോം എന്ന സൈറ്റ് വഴിയാണ് കെ എസ് ആര്‍ ടി സി സേവനവിവരങ്ങള്‍ നല്‍കുന്നത്. ഓണ്‍ലൈന്‍ വഴി സേവനങ്ങള്‍ നല്‍കുന്നതിലൂടെ സാമ്പത്തികപരമായി തകര്‍ന്നുക്കൊണ്ടിരിക്കുന്ന കെ എസ് ആര്‍ ടിയെ ഒരു പരിധി വരെ സംരക്ഷിക്കാനാകുമെന്ന പ്രതീക്ഷയിലാണ് സൈറ്റ് നിര്‍മ്മാതാവ്. ബാംഗ്ലൂരിലെ എഞ്ചിനീയറിംഗ് വിദ്യാര്‍ഥിയായ സുജിത് ഭക്തനാണ് സൈറ്റ് രൂപകല്‍പ്പന ചെയ്തിരിക്കുന്നത്.


‘സ്വകാര്യ ബസുകളെ ഭയക്കുന്നുവോ? എങ്കില്‍ സുരക്ഷിത യാത്രയ്ക്ക് കെ എസ് ആര്‍ ടി സി ബസുകള്‍ ഉപയോഗിക്കുക’ എന്നതാണ് സൈറ്റ് വഴി സുജിത് നല്‍കുന്ന സന്ദേശം. ഇത്തരമൊരു സൈറ്റ് തുടങ്ങിയതിനെതിരെ സ്വകാര്യ ബസ് ഉടമകളും തൊഴിലാളികളും ഭീഷണിയും തുടങ്ങിയിട്ടുണ്ട്. ബ്ലോഗിലും ഓര്‍ക്കൂട്ട് കമ്മ്യൂണിറ്റികളിലും സൈറ്റിനെതിരെ ചില സ്വകാര്യ ബസ് ഉടമകള്‍ രംഗത്ത് വന്നിട്ടുണ്ട്.

കെ എസ് ആര്‍ ടി സിക്ക് വേണ്ടി രണ്ടു വര്‍ഷം മുമ്പാണ് ഇത്തരമൊരു ബ്ലോഗ് തുടങ്ങിയതെങ്കിലും അടുത്തിടെയാണ് സജീവമായത്. സംസ്ഥാനത്തെ നിരവധി കെ എസ് ആര്‍ ടി സി യാത്രക്കാരില്‍ നിന്നും തനിക്ക് പൂര്‍ണ സഹകരണം ലഭിക്കുന്നുണ്ടെന്ന് സുജിത് പറഞ്ഞു.

സൈറ്റിന് ദിവസവും ആയിരത്തിന് മുകളില്‍ ഹിറ്റ്സ് ലഭിക്കുന്നുണ്ട്. ബാംഗ്ലൂര്‍, കൊച്ചി നഗരങ്ങളിലെ യാത്രക്കാരാണ് സൈറ്റ് പ്രധാനമായും ഉപയോഗപ്പെടുത്തുന്നത്. വെബ്സൈറ്റിന്റെ കീഴില്‍ കെ എസ് ആര്‍ ടി സിയും പൊതുജനങ്ങളും എന്ന വിഷയത്തില്‍ അടുത്തിടെ തിരുവനന്തപുരത്ത് സെമിനാര്‍ നടന്നിരുന്നു

കെഎസ്ആര്‍ടിസി ഈ വര്‍ഷം ആയിരം ബസുകള്‍ നിലത്തിറക്കുമെന്നു ഗതാഗത മന്ത്രി ജോസ് തെറ്റയില്‍. ഇതില്‍ 423 എണ്ണത്തിന്‍റെ ചെയ്സുകള്‍ വാങ്ങാന്‍ തീരുമാനിച്ചു. 304 ഓര്‍ഡിനറി ബസുകളും 116 ദീര്‍ഘദൂര ബസുകളുമാവും നിരത്തിലിറക്കുക.

നഗരത്തിലെ സിറ്റി സര്‍വീസുകള്‍ക്ക് പത്തു വര്‍ഷത്തിലേറെ പ്രായം. പഴഞ്ചന്‍ ബസില്‍ കയറാതെ ജനം സ്വകാര്യ ബസുകളെ ആശ്രയിക്കുന്നു. ഇതോടെ കെഎസ്ആര്‍ടിസിക്കു കനത്ത സാമ്പത്തിക നഷ്ടമാണ് ഉണ്ടാകുന്നത്.

ലോറിയും കെ.എസ്.ആര്‍.ടി.സി സൂപ്പര്‍ ഫാസ്റ്റ് ബസും കൂട്ടിയിടിച്ച് ബസ് യാത്രക്കാര്‍ ഉള്‍പ്പെടെ 11 പേര്‍ക്ക് പരിക്ക്. ദേശീയപാതയില്‍ പുന്നപ്ര വില്ലേജ് ഓഫീസിന് സമീപം ഇന്നലെ പുലര്‍ച്ചെ ആറരയോടെയായിരുന്നു അപകടം. മണല്‍ കയറ്റി തെക്കോട്ടുപോകുകയുയിരുന്ന ലോറിയും കൊല്ലത്തുനിന്നും എറണാകുളത്തേയ്ക്ക് പോയ സൂപ്പര്‍ ഫാസ്റ്റ് ബസുമാണ് അപകടത്തില്‍ പെട്ടത്. നിയന്ത്രണം തെറ്റിയ ലോറി കെ.എസ്.ആര്‍.ടി.സി ബസിലേയ്ക്ക് ഇടിച്ചുകയറുകയായിരുന്നു.

പരിക്കേറ്റ ലോറി ഡ്രൈവര്‍ പെരുമ്പാവൂര്‍ മുക്കേല്‍ വീട്ടില്‍ ഷക്കീര്‍(32), ക്ളീനര്‍ ഉണ്ണകൃഷ്ണന്‍(31), ബസ് യാത്രക്കാരായ അമ്പലപ്പുഴ കരൂര്‍ സ്വദേശി ഗോപാലകൃഷ്ണന്‍(46), നാരായണന്‍(70), ബിജിപ്പിള്ള(40), ടിജോതോമസ്(50), സത്യന്‍(48), അര്‍ച്ചന(37), ഉണ്ണിക്കൃഷ്ണന്‍(37), ഷിജി(42), ഇബ്രാഹിം(42) എന്നിവരെ വണ്ടാനം മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചു.

ഇടിയുടെ ആഘാതത്തില്‍ ലോറി ഡ്രൈവര്‍ വാഹനത്തിനുള്ളില്‍ കുടുങ്ങിപ്പോയി. ആലപ്പുഴയില്‍ നിന്നും ഫയര്‍ഫോഴ്സെത്തി ക്യാബിന്‍ വെട്ടിപ്പൊളിച്ചാണ് ഇയാളെ പുറത്തെടുത്തത്. അപകടത്തെത്തുടര്‍ന്ന് ദേശീയപാതിയില്‍ അരമണിക്കൂറോളം ഗതാഗതം തടസപ്പെട്ടു. ഇതേതുടര്‍ന്ന് വലിയനടക്കാവ് റോഡുവഴി ഗതാഗതം വഴിതിരിച്ച്വിടുകയായിരുന്നു. ലോറി മാറ്റിയതിനുശേഷമാണ് ഗതാഗതം പുനസ്ഥാപിക്കാനായത്.

Source: Kaumudi © Copyright Keralakaumudi Online 2009

കേവലം രണ്ട് മാസം കൂടി കാത്തിരിക്കു. ചുട്ടു പൊള്ളുന്ന കൊച്ചിയില്‍ ഇനി തണുത്ത യാത്രകള്‍ക്കായി കൂടുതല്‍ വോള്‍വോ ബസ്സുകള്‍ വരുന്നു. പുതിയ റൂട്ടുകളില്‍ കൂടി ആയിരിക്കും പുതിയ ബസ്സുകള്‍ ഓടുന്നത്. നഗരത്തിനു പുറത്ത് കൂടിയാണ് ഇപ്പോള്‍ ഉള്ള വണ്ടികള്‍. ഈയൊരു പരാതി ഉടന്‍ തന്നെ തീരുവാന്‍ പോകുന്നു.

ഇടുക്കി ജില്ലയില്‍ കെ.എസ്.ആര്‍.ടി.സി. കിതയ്ക്കുന്നു. കുത്തക റൂട്ടായ കോട്ടയം-കുമളി, കട്ടപ്പന-കോട്ടയം,കുമളി-കട്ടപ്

കട്ടപ്പന കെ.എസ്.ആര്‍.ടി.സി. സബ്ഡിപ്പോയില്‍ ഏപ്രില്‍ മാസത്തില്‍ ഡീസല്‍ പമ്പ് കമ്മീഷന്‍ ചെയ്യും. പുതിയതായി എറണാകുളം-കട്ടപ്പന-കുമളി റൂട്ടില്‍ ആറ് ഷെഡ്യൂളുള്‍ അനുവദിച്ചു.

ഡീസല്‍ പമ്പ് ഇല്ലാത്തതിനാല്‍ ലോക്കല്‍ സര്‍വ്വീസുകള്‍ നടത്തുന്നതിന് കെ.എസ്.ആര്‍.ടി.സി. കട്ടപ്പന സബ് ഡിപ്പോയ്ക്ക് തടസ്സങ്ങള്‍ നിലവിലുണ്ടായിരുന്നു.

പമ്പ് സ്ഥാപിക്കുന്നതിനുള്ള നടപടിക്രമങ്ങള്‍ ഇന്ത്യന്‍ ഓയില്‍ അധികൃതരുമായി സഹകരിച്ച് കെ.എസ്.ആര്‍.ടി.സി. പൂര്‍ത്തിയാക്കിക്കഴിഞ്ഞു. നിലവില്‍ ഡീസല്‍ പമ്പില്ലാത്തതിനാല്‍ മറ്റ് ഡിപ്പോകളിലെ പമ്പില്‍ നിന്ന് ഇന്ധനം നിറച്ചെത്തിയായിരുന്നു പതിവ്.

നിലവില്‍ 28 ബസ്സുകളാണ് ഡിപ്പോയിലുള്ളത്. പുതിയതായി ബസ്സുകള്‍ ലഭിക്കാതെ എറണാകുളത്തിനുള്ള പുതിയ ഷെഡ്യൂളുകള്‍ ആരംഭിക്കുന്നതിനും തടസ്സം നിലനില്‍ക്കുന്നു. ശബരിമല സീസണുശേഷം രണ്ടു പുതിയ ബസ് ഡിപ്പോയ്ക്ക് ലഭിച്ചിരുന്നു.

ബാംഗ്ലൂര്‍: ബന്ദിപ്പുര്‍ വഴി കേരളത്തിലേക്കുള്ള രാത്രികാല യാത്ര നിരോധിച്ചത് മലബാറിലെ യാത്രക്കാരെയാണ് ദുരിതത്തിലാക്കിയത്. പ്രശ്‌നത്തിന്റെ ഗൗരവം കണക്കിലെടുത്ത് മലബാറില്‍ നിന്ന് ബാംഗ്ലൂര്‍ക്ക് തീവണ്ടി സൗകര്യം ഏര്‍പ്പെടുത്താന്‍ മലയാളിയായ റെയില്‍വേ സഹമന്ത്രി ഇ. അഹമ്മദ് ശ്രമിക്കണമെന്ന് വിവിധ മലയാളി സംഘടനകള്‍ ആവശ്യപ്പെട്ടു.

ബസ് നിരക്ക് വര്‍ധനവില്‍ പ്രതിഷേധിച്ച് ബി.ജെ.പി. നേതാക്കള്‍ കെ.എസ്.ആര്‍.ടി.സി. ബസ്സില്‍ ടിക്കറ്റെടുക്കാതെ യാത്രചെയ്ത് അറസ്റ്റ്‌വരിച്ചു.കെ.എസ്.ആര്‍.ടി.സി.യുടെ കല്പറ്റ സൂപ്പര്‍ഫാസ്റ്റ് ബസ്സിലാണ് തമ്പാനൂര്‍ ബസ്സ്റ്റാന്‍ഡില്‍ നിന്നും അമ്പതോളം നേതാക്കള്‍ കയറിയത്. ഇവര്‍ ടിക്കെറ്റടുക്കാതെ ബസ്സിനുള്ളില്‍ പ്രതിഷേധിച്ചതോടെ തമ്പാനൂര്‍ സ്റ്റേഷന് മുന്നില്‍ ബസ് പോലീസ് തടഞ്ഞ് ഇവരെ അറസ്റ്റ്‌ചെയ്ത് നീക്കി.

ഓട്ടോ, ടാക്‌സി, ബസ് നിരക്ക് വര്‍ധനവിലൂടെ ജനങ്ങള്‍ക്കെതിരായ യുദ്ധപ്രഖ്യാപനമാണ് സര്‍ക്കാര്‍ നടത്തിയിരിക്കുന്നതെന്ന് സമരത്തിന് മുന്‍പ് നടത്തിയ പത്രസമ്മേളനത്തില്‍ ബി.ജെ.പി. സംസ്ഥാന പ്രസിഡന്റ് വി. മുരളീധരന്‍ ആരോപിച്ചു. നിരക്ക് വര്‍ധനവ് സ്വകാര്യ ബസ്സുടമകളുമായുള്ള ഒത്തുകളിയാണ്. വര്‍ധന സര്‍ക്കാര്‍ നേരത്തെ തീരുമാനിച്ചിരുന്നതാണ്-മുരളീധരന്‍ പറഞ്ഞു. വിലക്കയറ്റം കേന്ദ്രസര്‍ക്കാരിന്റെ തെറ്റായ നയങ്ങള്‍ കൊണ്ടുണ്ടായതാണ്. ഇതിനെതിരെ മാര്‍ച്ച് 20 മുതല്‍ ഏപ്രില്‍ 20 വരെ പഞ്ചായത്തുതല പദയാത്രകള്‍ സംഘടിപ്പിക്കും. ഏപ്രില്‍ 21ന് നടക്കുന്ന പാര്‍ലമെന്റ് മാര്‍ച്ചില്‍ രാഷ്ട്രപതിക്ക് ഭീമഹര്‍ജി നല്‍കുമെന്ന് പ്രസിഡന്റ് പറഞ്ഞു.

സംസ്ഥാന പ്രസിഡന്റ് വി. മുരളീധരന്റെ നേതൃത്വത്തിലാണ് വ്യാഴാഴ്ച വൈകീട്ട് ടിക്കറ്റെടുക്കാതെയുള്ള പ്രതിഷേധം നടന്നത്. മുന്‍ സംസ്ഥാന പ്രസിഡന്റ് പി.കെ. കൃഷ്ണദാസ്, ജനറല്‍സെക്രട്ടറിമാരായ എ.എന്‍. രാധാകൃഷ്ണന്‍, കെ. സുരേന്ദ്രന്‍, വൈസ് പ്രസിഡന്റുമാരായ കെ.പി. ശ്രീശന്‍, എ.പി. പത്മിനി, സെക്രട്ടറിമാരായ പി.എം. വേലായുധന്‍, ബി.കെ. ശേഖര്‍, മഹിളാമോര്‍ച്ച സംസ്ഥാന പ്രസിഡന്റ് ശോഭാ സുരേന്ദ്രന്‍, വക്താവ് ജോര്‍ജ് കുര്യന്‍, ജില്ലാ പ്രസിഡന്റ് കരമന ജയന്‍, ജനറല്‍സെക്രട്ടറി എസ്. സുരേഷ് എന്നിവര്‍ നേതൃത്വം നല്‍കി.

Source: http://www.anweshanam.com/

കോഴിക്കോട്: ഇന്ധനവില വര്‍ധനയുടെ പശ്ചാത്തലത്തില്‍ കേരളം ബസ് ചാര്‍ജ് കൂട്ടിയപ്പോള്‍ അയല്‍സംസ്ഥാനങ്ങളിലൊന്നും ചാര്‍ജ്‌വര്‍ധനയില്ല. മുംബൈ നഗരത്തിലാവട്ടെ, കുറഞ്ഞ നിരക്കായ മൂന്നു രൂപയില്‍നിന്ന് നേരിയ വര്‍ധന മാത്രമാണ് ആലോചിക്കുന്നത്.

ഇന്ധനവില കൂട്ടിയതിനെതിരെ വിമര്‍ശവുമായി രംഗത്തുവന്ന യു.പി.എ. ഘടകകക്ഷിയായ ഡി.എം.കെ. ഭരിക്കുന്ന തമിഴ്‌നാട്ടില്‍ ബസ്ചാര്‍ജ് കൂട്ടില്ല. പെട്രോളിയം വിലവര്‍ധനയുടെ പേരില്‍ സംസ്ഥാനത്ത് ചാര്‍ജ് കൂട്ടരുതെന്ന് മുഖ്യമന്ത്രി കരുണാനിധി ഗതാഗതമന്ത്രി കെ.എന്‍. നെഹ്രുവിന് നിര്‍ദേശം നല്‍കിക്കഴിഞ്ഞു. തമിഴ്‌നാട്ടില്‍ മിനിമം ചാര്‍ജ് രണ്ടു രൂപയാണ്. ഈ ടിക്കറ്റുകൊണ്ട് മെട്രോപൊളിറ്റന്‍ ട്രാന്‍സ്‌പോര്‍ട്ട് കോര്‍പ്പറേഷന്റെ (എം.ടി.സി.) ഓര്‍ഡിനറി ബസ്സില്‍ നാലു കിലോമീറ്റര്‍ വരുന്ന രണ്ടു ഫെയര്‍ സ്റ്റേജുകള്‍ യാത്ര ചെയ്യാം. സംസ്ഥാനത്ത് അവസാനമായി ചാര്‍ജ് കൂട്ടിയത് 2007 നവംബര്‍ 22-നാണ്. ലിമിറ്റഡ് സ്റ്റോപ്പ്, പോയന്റ് ടു പോയന്റ് സര്‍വീസുകളില്‍ രണ്ടരയും എക്‌സ്​പ്രസ് ബസ്സുകളില്‍ മൂന്നുമാണ് മിനിമം ചാര്‍ജ്. ഡീലക്‌സ് ബസ്സില്‍ ഇത് അഞ്ചും എയര്‍കണ്ടീഷന്‍ഡ് ബസ്സില്‍ പത്തും രൂപയാണ്.

തമിഴ്‌നാട്ടില്‍ പ്ലസ് ടു വരെയുള്ള സ്‌കൂള്‍കുട്ടികള്‍ക്ക് പൂര്‍ണമായും യാത്ര സൗജന്യമാണ്. കോളേജ്, പ്രൊഫഷണല്‍ വിദ്യാര്‍ഥികള്‍ക്ക് 50 ശതമാനം കണ്‍സഷനുണ്ട്. അവധിദിവസങ്ങളിലും വിദ്യാര്‍ഥികള്‍ക്ക് കണ്‍സഷന്‍ അനുവദിക്കും. എം.ടി.സി. ബസ്സുകളില്‍ 43.70 കിലോമീറ്റര്‍ യാത്രാപരിധിയില്‍ ഒരു ദിവസം എത്രവേണമെങ്കിലും യാത്ര ചെയ്യാന്‍ 30 രൂപയുടെ ടിക്കറ്റ് മതി.

ബി.ജെ.പി. ഭരിക്കുന്ന കര്‍ണാടകത്തില്‍ ബസ് ചാര്‍ജ് കൂട്ടാനുള്ള ഒരു നീക്കവുമില്ലെന്ന് 'ബാംഗ്ലൂര്‍ മെട്രോ ട്രാന്‍സ്‌പോര്‍ട്ട് കോര്‍പ്പറേഷന്‍' (ബി.എം.ടി.സി.) അധികൃതര്‍ അറിയിച്ചു. രണ്ടു കി.മീ. വരുന്ന ഒരു ഫെയര്‍‌സ്റ്റേജ് യാത്രചെയ്യാനാവുംവിധം മൂന്നു രൂപയാണ് ഇവിടെ മിനിമം ചാര്‍ജ്. 2009 ജൂലായ്മാസത്തിനുശേഷം കര്‍ണാടകത്തില്‍ ബസ്ചാര്‍ജ് കൂട്ടിയിട്ടില്ല. വിദ്യാര്‍ഥികളുടെ സൗജന്യയാത്രാനിരക്കും കൂട്ടാന്‍ നീക്കമില്ല.

സി.പി.എം. നേതൃത്വത്തിലുള്ള ഇടതുമുന്നണി ഭരിക്കുന്ന പശ്ചിമബംഗാളിലും ഇന്ധനവില വര്‍ധനയെത്തുടര്‍ന്ന് ബസ്ചാര്‍ജ് കൂട്ടില്ല. ആദ്യത്തെ നാലു കി.മീ. യാത്ര ചെയ്യാന്‍ സംസ്ഥാനത്ത് നാലു രൂപയാണ് ചാര്‍ജ്. എന്നാല്‍ ആറു രൂപ ടിക്കറ്റില്‍ അഞ്ചു മുതല്‍ 12 കി.മീ.വരെ യാത്ര ചെയ്യാം. അതിനുശേഷം ഓരോ നാലു കി.മീറ്ററിനും ഒരു രൂപവീതം അധികം നല്‍കിയാല്‍ മതി. 2008 നവംബര്‍ മുതലാണ് ഈ ചാര്‍ജുകള്‍ നിലവില്‍ വന്നത്. ബസ്ചാര്‍ജ് വര്‍ധിപ്പിക്കണമെന്ന ആവശ്യം ബസ് കോര്‍പ്പറേഷനുകളില്‍നിന്നോ ബസ്സുടമകളില്‍നിന്നോ ഇതുവരെ ഉയര്‍ന്നുവന്നിട്ടില്ല.

മുംബൈ നഗരത്തില്‍ ബസ് സര്‍വീസുകള്‍ നടത്തുന്നത് നഗരസഭയ്ക്കു കീഴിലുള്ള 'ബെസ്റ്റ്' ആണ്. രണ്ടു കിലോമീറ്റര്‍ യാത്ര ചെയ്യാന്‍ ഇപ്പോള്‍ ഈടാക്കുന്നത് മൂന്നു രൂപയാണ്. ഒന്നരവര്‍ഷമായി ഈ നിരക്ക് ഈടാക്കുന്നു. ഇതില്‍ ചെറിയ വര്‍ധന വരുത്തുന്ന കാര്യം ആലോചനയിലാണ്. മിനിമം ചാര്‍ജ് കൂട്ടിയാലും മൂന്നര രൂപയിലധികമാവില്ലെന്നാണ് സൂചന. ഇതുസംബന്ധിച്ച് അടുത്താഴ്ച തീരുമാനമുണ്ടാവും. ഒരു ദിവസം മുഴുവനും യാത്ര ചെയ്യാനുള്ള പാസ് 15 രൂപയ്ക്കും എ.സി. ബസ്സില്‍ പ്രതിമാസ പാസ് 750 രൂപയ്ക്കും ലഭിക്കും.

ആന്ധ്രയില്‍ രണ്ടു മാസം മുമ്പ് ബസ്ചാര്‍ജ് വര്‍ധിപ്പിച്ചിരുന്നു. ഇവിടെ മിനിമം ചാര്‍ജ് നാലു രൂപയാണ്. അതുകൊണ്ടുതന്നെ ബജറ്റിലെ പ്രഖ്യാപനത്തിന്റെ പശ്ചാത്തലത്തില്‍ ഇനിയുമൊരു വര്‍ധനയുണ്ടാവില്ല.

Source: www.mathrubhumi.com