യാത്രാസൗകര്യം ഉറപ്പുവരുത്തണമെന്ന് സംഘടനകള്
Posted by Sujith Bhakthan at Wednesday, 10 March 2010
കര്ണാടക ഹൈക്കോടതി വിധി മലബാര് യാത്രക്കാരുടെ പ്രതീക്ഷയെ തകര്ത്തതായി കര്ണാടക-കേരള ട്രാവലേഴ്സ് ഫോറം ജനറല് കണ്വീനര് ആര്. മുരളീധരന് അഭിപ്രായപ്പെട്ടു.
കണ്ണൂര്-യശ്വന്ത്പുര് ട്രെയിന് പ്രതിദിന വണ്ടിയാക്കണമെന്ന് ആവശ്യപ്പെട്ട് നിവേദനം നല്കിയെങ്കിലും നടപടിയുണ്ടായില്ലെന്ന് അദ്ദേഹം പറഞ്ഞു. ഇക്കാര്യത്തില് റെയില്വേ സഹമന്ത്രി പ്രത്യേകം ശ്രദ്ധചെലുത്തണം. രാത്രികാല നിരോധനം നീക്കാന് കേരള സര്ക്കാറിന്റെ ഭാഗത്തുനിന്ന് ശക്തമായ നടപടിയുണ്ടായില്ലെന്നും അദ്ദേഹം പറഞ്ഞു.
നിരോധനം ഹൈക്കോടതി ശരിവെച്ചതിന്റെ പിന്നില് കര്ണാടക സര്ക്കാറിന്റെ നിലപാടാണെന്ന് കെ.കെ.ടി.എഫ്. ജോയന്റ് കണ്വീനര് സി. കുഞ്ഞപ്പന് അഭിപ്രായപ്പെട്ടു.
നിരോധനത്തിനെതിരെ കേരള സര്ക്കാറുംജനപ്രതിനിധികളും കെ.കെ.ടി.എഫും ശ്രമം നടത്തിയിരുന്നു. നിരോധനം പിന്വലിക്കുന്നതിനുവേണ്ട നടപടികള് സ്വീകരിക്കാന് കര്ണാടക മുഖ്യമന്ത്രി യെദ്യൂരപ്പയുടെ സാന്നിധ്യത്തില് ചേര്ന്ന ഉന്നതതല യോഗം തീരുമാനിച്ചിരുന്നു. കേരള വനം വകുപ്പ് മന്ത്രി ബിനോയ് വിശ്വത്തിന്റെ നേതൃത്വത്തില് ബാംഗ്ലൂരിലെത്തിയ കേരള സര്ക്കാര് പ്രതിനിധിസംഘത്തിന് നിരോധനം പിന്വലിക്കാമെന്ന വാഗ്ദാനവും ലഭിച്ചു. ബദല് പാത വനത്തില്ക്കൂടി കടന്നുപോകുന്നതും ദൈര്ഘ്യമേറിയതുമാണ്.
കെ.കെ.ടി.എഫ്. നിയമനടപടികളുമായി മുന്നോട്ടുപോകും.
സുല്ത്താന്ബത്തേരിയില് രൂപവത്കരിച്ച സര്വകക്ഷി ആക്ഷന് കമ്മിറ്റിയുമായി സഹകരിച്ച് സമര പരിപാടികള് സംഘടിപ്പിക്കുമെന്നും അദ്ദേഹം പറഞ്ഞു.
കേരളത്തിലേക്കുള്ള ബദല് യാത്രാപദ്ധതി വേഗത്തിലാക്കാന് കര്ണാടക സര്ക്കാര് നടപടി സ്വീകരിക്കണമെന്ന് ബാംഗ്ലൂര് കേരള സമാജം പ്രസിഡന്റ് സി.പി. രാധാകൃഷ്ണന് ആവശ്യപ്പെട്ടു.
രാത്രിയാത്രാ വിലക്ക് ഏര്പ്പെടുത്തിക്കൊണ്ടുള്ള ഹൈക്കോടതി ഉത്തരവ് നിരാശാജനകമാണെന്ന് എന്.എസ്.എസ്.ബി. ജനറല് സെക്രട്ടറി പി.ജി. നായര് അഭിപ്രായപ്പെട്ടു. ഭാവി നിയമനടപടകള്ക്ക് കെ.കെ.ടി.എഫിന് പൂര്ണ പിന്തുണ നല്കുമെന്നും അദ്ദേഹം പറഞ്ഞു.
ബാംഗ്ലൂരില്നിന്നു കേരളത്തിലേക്കുള്ള ബദല് റോഡ് വേഗത്തില് പൂര്ത്തീകരിക്കുന്ന കാര്യത്തില് സംശയമുണ്ടെന്ന് കേരള മുസ്ലിം കള്ച്ചറല് സെന്റര് പ്രസിഡന്റ് മെഡിക്കല് അബ്ദുള്ളഹാജി അഭിപ്രായപ്പെട്ടു. മാക്കൂട്ടം റോഡിന്റെ പണി ആറു മാസത്തിനുള്ളില് പൂര്ത്തിയാക്കാന് കോടതി ഉത്തരവുണ്ടായിട്ടും മൂന്നു വര്ഷമായിട്ടും നടപ്പായിട്ടില്ലെന്ന് അദ്ദേഹം ചൂണ്ടിക്കാട്ടി.
കോടതിവിധി നിരാശാജനകമാണെന്നും ഹൈക്കോടതി വിധിക്കെതിരെ അപ്പീല് നല്കുമെന്നും നാഷണല് ലോയേഴ്സ് ഫോറം കണ്വീനറും സര്വകക്ഷി സമിതി ജോയന്റ് കണ്വീനറുമായ അഡ്വ.എം. രാജന്
പറഞ്ഞു.
Source: Mathrubhumi.com
