KSRTC സിറ്റി ബസുകള് നിരത്തുകളില് ഭീതിയാകുന്നു
Posted by Sujith Bhakthan at Monday, 29 March 2010
നഗരത്തിലോടുന്ന കെഎസ്ആര്ടിസിയുടെ 412 ബസുകളില് ഭൂരിഭാഗവും പൊട്ടി പൊളിഞ്ഞു. എന്നാല് ഓരോ ദിവസവും പുതിയ സ്വകാര്യ ബസുകള് നിരത്തിലിറങ്ങുന്നു. നല്ല സീറ്റുകളും ആകര്ഷകമായ നിറങ്ങളും യാത്രക്കാരെ ആകര്ഷിക്കുന്നു. ഈ വര്ഷം കെഎസ്ആര്ടിസി 1000 ബസുകള് നിരത്തിലിറക്കുമെന്നു പ്രഖ്യാപിച്ചിട്ടുണ്ട്. എന്നാല് ഇതില് ഒന്നു പോലും സിറ്റി സര്വീസിനില്ല.
പത്തു വര്ഷം പഴക്കമുള്ള ബസുകള് മെട്രൊ നഗരങ്ങളില് സര്വീസ് നടത്താന് അനുവദിക്കില്ല. വര്ഷങ്ങള്ക്കു മുന്പു തന്നെ പ്രധാന നഗരങ്ങളില് ഈ നിയമം നിലവില് വന്നതാണ്. എന്നാല് സംസ്ഥാന തലസ്ഥാനത്തു മാത്രം ഇപ്പോഴും പാട്ട വണ്ടികളിലാണ്. മഴപെയ്താല് ചോരുന്ന ബസുകളും, തുരുമ്പിച്ച കമ്പികള് എഴുന്നു നില്ക്കുന്ന സീറ്റുകളും, ലാഡറുകള് ഏതു സമയത്തും ഇളകി പോകാന് തക്ക വിധത്തിലുമാണ് ഇവിടുത്തെ സിറ്റി ബസുകള്.
സിറ്റി ബസുകളുടെ പ്രവര്ത്തനം പിന്നോട്ടായതോടെ സര്ക്കാര് അനന്തപുരി ഫാസ്റ്റുകള് നിരത്തിലിറക്കി. 254 എണ്ണമാണു ഈ വിഭാഗത്തില് ഇപ്പോള് സര്വീസ് നടത്തുന്നത്. സ്വകാര്യ ബസുകളോടു കടപിടിക്കുന്നവയാണ് അനന്തപുരി ഫാസ്റ്റുകള്.
154 സിറ്റി ബസുകളാണു കണ്ടം വെക്കാറായിട്ടും പ്രധാന വീഥികളിലൂടെ സര്വീസ് തുടരുന്നത്. ഇതില് കുറച്ചു ബസുകള് കട്ടപ്പുറത്തുമാണ്. പ്രാണ ഭയത്താല് ഇത്തരം ബസുകളില് കയറാന് തങ്ങളില്ലെന്നു പലരും പറയുന്നു.
തിരുവനന്തപുരം സിറ്റി, പാപ്പനം കോട്, പേരൂര്ക്കട, വെള്ളനാട്, എന്നീ ഡിപ്പൊകളില് നിന്നാണു സിറ്റി സര്വീസ് ഓപ്പറേറ്റു ചെയ്യുന്നത്. കേന്ദ്രാവിഷ്കൃത പദ്ധതിയായ ജെഎന്എന്യുആര്എം വഴി നഗരത്തിലോടിക്കാന് 150 ലോ-ഫ്ളോര് ബസുകള് വാങ്ങാന് ഫണ്ട് അനുവദിച്ചിരുന്നു. എന്നാല് ഇപ്പോള് എട്ടു ബസുകളാണ് എത്തിയിരിക്കുന്നത്. ഇതിന്റെ ടിക്കറ്റ് ചാര്ജ് സാധാരണക്കാര്ക്കു താങ്ങാന് കഴിയില്ല. അതിനാല് ഈ ബസിലുള്ള യാത്ര ഒഴിവാക്കുകയാണു ജനങ്ങള്.
കാലാവസ്ഥക്ക് അനുസൃതമായ ലോഫ്ളോര് ബസുകള് വരും ദിവസങ്ങളില് കൂടുതല് ഉപയോഗപ്പെടുമെന്ന വിശ്വാസത്തിലാണ് അധികൃതര്. കൂടുതല് ലോ - ഫ്ളോര് ബസുകള് എത്തിക്കാന് നഗരസഭയും കെഎസ്ആര്ടിസിയും സംയുക്തമായുള്ള കമ്പനി രൂപീകരിക്കണം. ഇതിനുള്ള ശ്രമങ്ങള് ഇതുവരെ അധികൃതര് ആരംഭിച്ചിട്ടില്ല.
ഗതകാല സ്മരണകള് ഉണര്ത്തി നിരത്തിലോടിയിരുന്ന ഡബിള്ഡക്കര് ബസ് നിര്ത്തലാക്കിയിട്ടു വര്ഷങ്ങള് കഴിഞ്ഞു. അതിനോടൊപ്പം സര്വീസ് ആരംഭിച്ച മറ്റു സിറ്റി ബസുകള് ഇപ്പോഴും നിരത്തിലുണ്ട്. പഴക്കം ചെന്ന സിറ്റി ബസുകള്ക്കു പകരം പുതിയ സിറ്റി ബസുകള് വേണമെന്നു ട്രാന്സ്പോര്ട്ട് വകുപ്പിലെ സംഘടനകള് ആവശ്യപ്പെട്ടിട്ടുണ്ട്.
ജീവന്പണയം വച്ചാണു കാലഹരണപ്പെട്ട ബസുകള് ഓടിക്കുന്നതെന്നു ഡ്രൈവര്മാര് പറയുന്നു. ജനത്തെ ഭീതിപ്പെടുത്തുന്ന, സ്വന്തം ജീവനു ഭീഷണിയാകുന്ന ബസുകളെക്കുറിച്ച് വകുപ്പു മന്ത്രിക്കു പരാതി നല്കി കാത്തിരിക്കുകയാണു ഡ്രൈവര്മാര്.
Source: http://www.metrovaartha.com/© 2010 All Rights Reserved, Vaartha Realty Media (P) Ltd
